Tant auguri per Nadèl,
che l’an nóv àl sia piò bèl,
cùn l’aiùt ‘d Gesò Bambèin
la salùt la’v staga vsèin.
An quatòrdes dàl doméla:
tànti ciàcher, poca pélla..
Àl presèpi, per tachèr,
a vedràm se psérel fer...
àl Bambèin, i-l’àn blindê
in ùn bùncher corazê,
i Re magi ièin bluchê
da ‘na fila ‘d car-armê,
la cumàtta sequestrèda
da-una sonda clè-arivèda.
Cusa vlìv? L’è-un mànd achsè.
Ecco quàl c’amarcòrd mè:
Cùn un’intervèint a-àl crani
K.O. l’è-andê Bersani.
Tanta solidarietê,
prémma d’éser rutamê.
Renzi-Letta in dàl PD
una lit che tót cgnusî..
e Giorgio Napolitàn
l’à fat Premièr àl tuscàn
che-in Europa l’à stravìnt
e per quindi l’à cunvìnt.
Tót ièin córs-lè per zzerchèr
àl baròz in-da muntèr...
Po’-in Europa, Presidèint,
lò l’à bele mustrê-i dèint.
(El rifórmi? Prumés tanti...
bastarév fèren soquànti.)
La sô lit l’è cùn Landèin,
c’àn-né ménga “ùn traturèin”...
Nazareno-Berluscòun... ?
Un pât fùr’b e spurcaciòun.
In Emilia, a capirî...
iàn vutê sól du su trî...
Quesi tót ièin dispiesû
mo-a Predappio... iàn ridû.
E-adès... via cùn el questiòun
c’ag-avàmm in dàl zzestòun.
San Franzàsch l’à-vést Bergoglio
e-àl-gà dét che l’erba “voglio”
l’è-una smèinza da cambièr
cùn di frut chi’s ciàmen “dèr”.
Nòster Pèpa, as’arcmandàmm
per-i-guai-gròs c’ag-avàmm:
ùn Caléff c’àl taja èl tèst,
l’ebola dvintèda pèst!
E-àt giàm grazie d’és’r-andê
in Turchia, cùn umiltê,
per unìr tóti-el persòun
ed qualunque religiòun.
Gènova e po’ Carrèra:
una tera marinèra
stófa’d-chi la vól sfrutèr,
l’à-butê i sô fiór in mer!
Mort, dan, devastaziòun,
aqua un-pô-in tót-i cantòun...
Àn ghè piò del pasarèini,
di sturnê, dèl rundanèini,
gnanch-un mérel c’al s’cifèla;
a-ghè armès sól ‘na zinzèla
négra, strana, testa fina,
arivèda da la Cina.
Cùn una liquidaziòun
ed vintzìnch-vintsèt miliòun
Montezèmolo àl s’in và.
La Ferari? Beh... às vedrà...
La Madàna in purcisiòun
inchinèda a càl balcòun
in –d-a-stà ùn cap mafiós,
l’è biestàmma a-èlta vós.
A Dell’Utri la galéra
cùn Scagliola: srà po’ vera?
Ràma, pina ed tumór.
Tanta speranza. Gran dulór.
Modna: Séndech Muzarèl:
àl piò fùreb dàl mapèl.
Grillo, stóff, àl gà mulê
e l’Hotèl cl’iva fundê,
zìnch (e)stràll, piscina-e-via...
l’è dvintê ‘na Tratorìa.
Nibali, brèv siciliàn,
prém a-àl Tour: batàm’gh-èl-man!
Àl balòun dla nazionèl
l’à fat flòp in dàl mondièl.
E-a finès cùn ‘na speranza
c’a-la-vrév ciamèr Samantha.
Italiana, finalmèint,
stràla immez a-al firmamèint.
E arcurdèv, chèr ragazô,
c’avaspèt ai Runcaciô..