Cùm-av-vdî, aiò suspés “UN DÈ DLA STMÀNA”  perché-àn tróv gnìnt d’originèl per bacaièregh adrê: politica, politica, politica, Grecia, Barcòun, delétt, coruziòun. PD, Grillo, Salvini (o vicéversa) e via-andare… Àl sò che àl mànd l’è piò grand ed chél ciavèdi lè mo la gèint la vól quàl-lè! Per intànt, basta. St’ètra stmana, as  vedrà. Per intànt a zércarò ed cavèrmla cùn un argomèint c’àm fa bruntlèr, sul séri, da  matèina a sira.

            A-lò intitolê L’ARECLÀM . Opùre, cùm-às-prévv dir, LA PUBLICITÊ. Fê vuèter… Da la zòpa a-la Lurèinza (nota sciancata) g-ghè poca diferèinza…dice un vecchio adagio.

            Tutti sappiamo che la pubblicità è “l’anima del commercio” e per quindi a sun d’acord che bisgnarà soportèr bigliàtt, biglitèin, giornê, giurnalèin, fotografî… ecétera…chi’t vólen per forza infurmèr, fèret vadder o vàndèr quàl che magari t’àn te srévv mai insugnê ed cumprèr…

            Insàma, cùm a dis Piròun (c’àl tós la parola quànd  àl cràdd)… l’areclàm àl duvrév arivèr sol a chi àl le tôs luntéra.   Anch se mè am’arcòrd un quèl c’al-m-fa-ancàra imbestialìr. E cioè: quànd a saltè fóra Berluscoun cùn èl so televisiòun, àl cumincè a fer vàdder el telenovèli e achsè tótti el dànn èl-s-g’atachénn come la laddra (o laddria e cioè l’edera). Po’, quànd èl-s-éren atachèdi amód, Berlus àl cumincè a intramzèregh (a mettervi ammezzo) di areclàm. In dimandi èl’s lamentèven e-achsè anch la concorèinza. Alóra i pensén bein ed  fér un referèndum per decìder  sé o no agli interuziòun cùn di areclam in di film, in del telenovèli, ecétera. Mo sicome Berlósca àl gè che sèinza la publicitê àn n’avrév piò psû fer vadder el telenovèli, la magiorànza la gè: SÌ !

            Incô àn n’è piò un problema perché ag’avàm, per esèimpi, dèl rezdóri che sèinza i areclam e la roba bèle pròunta èn savrén gnanch fer da magnèr… Quidi: o dèregh ragiòun, o murìr ‘d fam.

            Bravo Piròun. Àn-m’arcurdèva brisa cla facénda lè… del telenovèli.

            Per mè, però, a-ghè di quê ancàra piò ghignós (dispettosi, fastidiosi)come quànd qui ed la Rai-tv i fan i gób (fanno i finti tonti). Tulàmm, per esempi, un telegiornèl: prémma it fan edl’areclam (e tè te stê lè perché a t’interésa àl meteo), ariva àl meteo e it fan vàdder el previsiòun d’incó (e si pséssen it farén quìli d’iér…). Po’ àl TG e, a la fin, àl meteo. Mo… sol per dmàn perché i-g’an prèsia e l’aeroplanàtich àl t’dis che piò terd àl-t-darà quìli ed pas’dmàn…E zò areclàm!

            E l’areclam i-àl fan dapertótt. Salvo, forse, in Ciésa in duv i dan ancàra via  di santèin cùn di sant e brisa cùn un zugadór da futbàll mo… in Piàza San Péder, per l’Angelico (Angelus) Pepa Franzàsch l’à bele cuminciê a slunghèr quèl… Sèimper dàl mand Celest ma… sèimper reclam!

            Tulàmm (prendiamo) àl computer. Èt zzérch internèt… e subét às presèinta dó s’ciap cùn immez ùn triangulèin chi sréven i slip e la scrétta“sculacciami”. (cl’às-móv ànch! …)

  Po’, et-vê a zzerchèr dèl nutézi… per esèimpi, dato c’àg sàm, sóv’r-a-la-Gazàtta che te’gh-vàdd sé-e-no àl tìtol innèz a ‘na cunfusiòun de stréssi colorèdi ch’èl prélen per tótt i vérs…Piò in bas, et vàd una fàcia ech-t’interèsa… ma propria in càl mumèint lè agh-arìva in ghégna un patachèin(finestra?)  c’àl le quàcia daltótt  Im’àn insgnê a schizèr àl tast sinister dàl pòundegh (il mouse) e per un’ atim l’è sparî mo… sól per fer post a un’èter patachèin ancàra piò gròs; quesi uguèl a quàl c’aiavrév psû sculazèr prémma. Quàst,  però, àn-gla chèv menga a tórel via mo… sicòme l’è arivê me muiéra cla’m-prév der dàl spurcaciòun… a schéz àl pòundegh e a tir via incòsa!

            E… l’unich areclàm c’aiò vést l’è stê…ùn cul.