L’è capitê, chè ultmamèint, che invece-ed descàrrer(scréver) sól d’un fat, d’un quèl, aiò scrétt ed trê nutézi e mèz… dô nutézi…ecètera… E lizànd i giornê o èl “news”, àm sun acòrt che  el nutézi, giàm achsè, interesànti èl pólen éser anch depiò. E alóra, a-m’è gnû l’idea èd comentèr quili d’un zért giornèl, in un zért gióren dla stmàna, a ósta (usta:occhio e croce) e… quànd a cràdd.

L’idea, per la veritê, la vin-anch da la vóia ed Piròun ed savér quant quê a capita in-un-dè, in dàl mand e-po’-ànch ed dir la sô  (L’idea viene soprattutto dal desiderio di Piròun di conoscere quante cose capitano, in un sol giorno, nel mondo ed anche di poter esprimere la propria idea).

Ecco chè èl nutézi c’àm per a mè…in dàl gióren c’a-dégh mè…in dàl giornèl c’a-cràdd mè!

LA GRANDE GUERRA : “Il Piave mormorava calmo e placido il passaggio dei primi fanti il 24 Maggio” E chè àgh zuntàm 1915: zèint’an fa!

Me non, a dis Piròun, l’era “un ragazzo del ‘99” e àl fè la guèra. Lò àl turnè a cà mo in cla guèra lè a murè nóv miliòun ‘d suldê. Èter vint miliòun i restén invalid o i turnén mat! E quànd a ghe dmandèva àl perché iéren andê in guera àl-m-rispundiva: per la Patria… per il Re.

Pepa Franzàsch l’à détt, àl dè d’incô, quàl che-a-gè, alóra, àl Pepa Benedetto XV°: “è una inutile strage”. E Piròun àl conclùd: brèv come àl solit àl noster Pastór c’àl tin d’acàt (che tiene d’acconto) èl sô pégri e ànch chi cavròun c’a sàm nuèter. Eterchè Patria…eterchè Vituriàtt…E a chi s’atèinta a descàrrer ed guèra agh vól détt: và a c.ghèr!

PALMIRA . Sull’antichissima città Siriana, patrimonio dell’umanità, sventota il nero drappo dell’ISIS.

E anch lè, onna del tanti guèr c’a-ghè in gir per àl mand. E anch lè  tant zzintunèra e mièra ed mort. Mazê come ai tèimp ed la Bibia in cla zzitê lè quànd i sguzèven (sgozzavano) àm e chèvri, opure cùn di bagài ch’i-ciàmen “dróni”. Di areoplàn sèinza pilota chi bóten zò del bamb chi brusen “ rósch e bósch”e cioè incosa…Chi ciàpa, ciàpa…Cumprés dànn, àm e ragazô. E achsè a sàm ancàra piò lofi (cattivi, buoni a nulla) di-nòster vigliàch nemìgh tajatèst che qui sé bisgnarév castighèri! Sè. Perché lór, una volta tirê-so àl capócc, i-g’armitréven ecóme mo… àl dróne c’a préven ciamèr l’innominato sicario”, no.

E Piròun? Beh…A c.ghèr tótt du, l’ha détt,  e… sèinza tirèr zò i mudand!!

NOZZE GAY : La cattolicissima Irlanda ha detto SI con un referendum popolare alle nozze fra persone dello stesso sesso.

Quasta l’è grosa! Iàn sorpasê Pepa Francesco… in curva! Ièin stê d’acord àl 60 %.  E la Santa Sede ha commentato “…è una sconfitta per l’umanità “

Adès bisgnarà spetèr el Leg per capir come i faràn a saltèregh fóra cùn una Lég ch-la màtta d’acòrd natura, cultura, religiòun, tradiziòun, procreaziòun, ecètera… ecètera

A sorpresa, a selta so Piròun c’al dis:  gnìnt paura. I gàn avû dàl curàg a tirèr fóra àl ragn dàl bus…Spetàmm… Se per nòz a vlés dir afradlères… a-s’in-prévv descàrrer… Spetàmm…

GERMANIA: donna di 65 anni partorisce quattro gemelli. Ha già altri tredici figli.

Piròun: da un’esageraziòun a cl’etra! Beh…mè a dégh che dop aver avû tràdes fiô, l’in parturéss èter quàter sèinza gnanch sèint’r’àl góst…l’àn-né brisa normèl. Le-le(Lei-lì) l’è màta!!