Eilàaa… Bongióren! O bonasìra, sl’è già basôra. Pomeriggio, per gli uomini “in lingua”.

            Quasta l’è una bruntlèda particolèr in dàl sèins c’a zercarò ed truvèr, ogni tant, una nutézia, un fat, un quèl c’àl g’àva l’idea d’éser una bala piò gròsa ed chèl tanti c’a-ghè in gîr. (cercherò di trovare, ogni tanto, una notizia, un fatto, un qualcosa che renda l’idea di essere una panzana più grossa di quelle tante che circolano) Difficile? Di certo la scelta non sarà facile anche perchè “el bali egli-ein-bal, ma a strichèrli èl fan mel”.

            La préma la m’è sembrèda fàcil ànch se po’, in ‘ste mànd mat come un cavécc la prév éser adiritùra una veritê (la prima mi è sembrata facile anche se poi, in questo mondo “matto come un cavicchio” potrebbe essere una verità). Un fatto è certo: questa notizia  è una news di internet.                       Padre Parker, ùn Pastór ed la White Chapel ed la Virginia (USA), l’à invidê i sô parochiàn a-andèr a la Massa nud: nud nê. Perché, l’à dét, l’è óra ed dèr’gh-ùn tài cùn tótta ‘stè-elegànza… che po’ l’è dvintèda insoportàbil per tóti èl persòun che, esànd piò puvràti, en pólen brisa stèr’gh-a-róda (non possono reggere il confronto). E sicóme quànd a sàm nê aiéren nud, a turnàm lè: tót uguê! (beh… quèsi…).

            S’a-la-mitàm achsè la prév éser anch una bòuna ragiòun… mo quàl c’àn-ném  tórna brisa l’è àl fat ed la massa… Perchè àl prêt, àl celebrànt, srével nud anca lò? Sèinza i paramèint? Opure cùn ‘na “stòla” ch-la-gh’incurnìsa…la natura?”  No…no… àn-ne’gh-sàm ménga… E po’, invece ed la Sagrestia, un spogliatòio al’entrèda per tót? Eh, sé.  Anch perché gnir fóra ed cà nud nê it metréven in galéra… o in di mat… Opure, ecco… àl prév éser un paês… ùn sit  fat achsè, ed naturésta… e alóra àn ghe srév gnànch un negozi d’abigliamèint ma sol una quech pianta ed figh.

            L’è una bala… Secànd mè, l’è una bala!

            Àl fat dàl nud… d’avér vóia d’éser nud… àl sambra però un quèl lògich…

            L’è-ed chi gióren chè, per esèimpi, la nutézia ed la nostra Gazàta che un gróp ed ragàz “in grìngola”  (alticci), is-èin cavê zò…e po’, mèz nud, ièin saltê a balèr dèinter a la funtana ed Piàza ed la Madàna di Mòunt, a Ràma !! ( un gruppo di ragazzi, alticci, si sono spogliati e messi a ballare, seminudi, dentro la fontana di Piazza della Madonna dei Monti, a Roma).  Vóia ed libertê? A pól éser… Mo quànd l’è arivê i Vìgil, chi éren lè, a du pas dàl Colosèo,  i gàn dê la multa come “vandali”. La lég…  Mo mè a pèins che la Madàna la’s-sia mésa a rédder…

            Piròun àl vól dir la sô.

            Come sèimper l’è na quistioun d’educaziòun, ed bòun seins, ed rispèt per egli-idei ed chi èter. Mè aiò sintî descàrrer ed naturalìsem (naturismo) e dàl perché àn duvàm brisa avér paura d’éser nud. Dòun Vasco àl giva che Adamo e Eva i éren nud… che Dio li aviva fat nud ma po’ i àn magnê càl pàm lè… che, secànd mè, l’era anch pin ed pél…,  i–s’ èin vergugnê e i àn méss sò la fóia ed fìgh.  Ecco:  però… nuèter a sàm stê abituê a desvistìr chèl dànn cùn i oc…(noi  siamo stati abituati a spogliare le donne con gli occhi) e quànd a la vdìven nuda… beh… a dvintèven di mandrìlo… e quindi…Mè, secànd mè, càl Pastór ed cla Capèla lè… e po’ anch  i “fedeli” ch’in-n’éren brisa abituê a vàdder dèl ragazèli che quèch ora préma i-aviven desvistî cùn i oc…insama…” a se’gh solevèva… àl problema “.

            Menga tótt i psiven éser come àl pover Zemianèin cl’iva fat un bus in dàl linzól e quànd l’andèva a let cùn sô muiéra, àl la cruviva e po’ l’insfilzèva àl bus…

            Forse, però… ànch questa l’è una bala!